តើ​កូន​មាន​អាការ​បែបណា​ដែល​ត្រូវ​នាំទៅ​មន្ទីរពេទ្យភ្លាម?​

មិន​ថា អាការ​នេះ​នឹង​កើតឡើង​ចំពោះ​កូនតូច ឬ​កូន​ធំ​នោះទេ លោកឪពុក​អ្នក​ម្តាយ​ត្រូវ​ចេះ​សង្កេត​មើលថា តើ​វា​ខុស​ប្រក្រតី​ដែរឬទេ? ហើយ​អាការ​បែបណា​ដែល​ត្រូវ​នាំ​កូន​ទៅ​មន្ទីរពេទ្យភ្លាមៗតែម្តង។ តើ​អាការ​គ្រោះថ្នាក់​ទាំងនោះ​មាន​អ្វីខ្លះ? សូម​លោកឪពុក​អ្នក​ម្តាយ​តាមដាន​ជា​បន្ត។

1. ក្តៅខ្លួន​លើសពី38.5អង្សា​សេល​សៀ​ស(អង្សា C) ៈ បើ កូន​ក្តៅខ្លួនតិចៗ ចូរ​ឱ្យ​កូន​ញ៉ាំ​ថ្នាំ​បញ្ចុះ​កម្តៅ ឬ​យក​ក្រណាត់​សើម​ជូត​ខ្លួន​ឱ្យ​ត្រជាក់ និង​ឱ្យ​ញ៉ាំ​ទឹក​ឱ្យ​ច្រើន ដើម្បី​សម្រាល​អាការ​ក្តៅខ្លួន។ តែបើ​កូនចាប់​ផ្តើមឡើង​កម្តៅ​ខ្ពស់ ញ៉ាំ​អាហារ​មិនបាន ក្តៅខ្លួន​យូរថ្ងៃ ធ្វើយ៉ាងណា​ក៏​កម្តៅ​មិន​ថយចុះ​ដែរនោះ ចាំបាច់​ត្រូវតែ​នាំទៅ​មន្ទីរពេទ្យ ដើម្បី​ពិនិត្យ​មើលថា​នេះ​ជា​អាការ​គ្រុន​ផ្តាសាយធំឬ​ជា​អាការ​ជំងឺគ្រុនឈាម​ភ្លាម។

2. អាការ ឈឺចាប់​បែបខ្លាំងៗ ៈ ដូចជា ចុកពោះ ឈឺក្បាល បើ​មាន​អាការ​ចុកពោះ​បែប​ចុក​ឡើង​កោង​ខ្លួន ក្តាប់ដៃ​ណែន ប្រឹង​បាតជើង​ឡើង​ក្រ​ញ៉​ង់ មិន​ញ៉ាំ​អាហារ បន្ទោបង់​ខុស​ប្រក្រតី ត្រូវ​ប្រញាប់​នាំទៅ​ជួប​គ្រូពេទ្យ​ជាបន្ទាន់ ព្រោះ​អាច​កើត​អាការ​រលាក​ពោះវៀន ឬ​រលាក​ខ្នែងពោះវៀន តែបើ​មាន​អាការ​ឈឺក្បាល អាច​សង្កេតមើល​អាការ​តាមរយៈ​ការដែល​កូន​នៅ​ស្ងៀម ស្រងូតស្រងាត់ មិន​ស្រស់ស្រាយ ញ៉ាំ​អាហារ​មិនបាន និយាយ​មិន​ច្បាស់ ដើរ​មិន​ប្រក្រតី អាការ​បែបនេះ​អាច​ធ្ងន់ធ្ងរ​ដល់​ថ្នាក់​រលាក​ស្រោមខួរ​បាន ដូច្នេះ​ត្រូវ​ប្រញាប់​នាំ​កូន​ទៅ​មន្ទីរពេទ្យ​ជាបន្ទាន់ ដើម្បីឱ្យ​គ្រូពេទ្យ​ពិនិត្យ និង​ព្យាបាល​ឱ្យទាន់​ពេលវេលា។

3. ក្អួតចង្អោរ ៈ បើ​កូន​មាន​អាការ​ក្អួតចង្អោរ​ញឹកញាប់ និង​ច្រើនឡើងជារឿយៗនោះ អាចធ្វើឱ្យ​ខ្វះ​ជាតិ​ទឹកបាន បេះដូង​នឹង​លោត​ញាប់ ធ្វើឱ្យ​សម្ពាធ​ឈាម​ធ្លាក់ចុះ​ទាប អាចធ្វើឱ្យ​គាំង​ក្រលៀនដែលជា​រឿង​មួយ គ្រោះថ្នាក់​ណាស់ ហើយ​បើ​កូន​មាន​អា​ការរួម​ផ្សេងទៀត​ដូចជា ឈឺក្បាល កម្តៅ​ខ្លួន​ឡើង​ខ្ពស់ ប្រកាច់ អាការ​បែបនេះ​កូន​អាចមាន​ឆ្លង​មេរោគ​ក្នុង​ខួរក្បាល ឬ​រលាក​ស្រោមខួរ​បាន។

4. ដកដង្ហើម ខុស​ប្រក្រតី ៈ បើ​កូន​មាន​អាការ​ក្អក​ដូច​មាន​ស្លេស្ម ដកដង្ហើម​ខុស​ចង្វាក់ ដកដង្ហើម​លឿន ដើមទ្រូង​ផត បេះដូង​លោត​ញាប់ ខ្លួន​ឡើង​ពណ៌​ស្វាយ និង​នៅ​ស្ងៀម អាការ​បែបនេះ​កូន​អាចមាន​សភាវ​គាំង​ប្រព័ន្ធ​ដកដង្ហើម ដែល​ធ្វើឱ្យ​ក្មេង​ស្លាប់​បាន។

5. បន្ទាល​ត្រ​អាក ៈ បើជា​បន្ទាល​ត្រ​អាក​ទូទៅ​នឹង​កើតតិចៗ និង​បំបែក​ខ្លួន តែ​បើជា​បន្ទាល​ត្រ​អាក​ដែល​ឡើងក្រាស់ៗ កើត2-3ថ្ងៃ​ហើយក៏​នៅតែ​មិន​បាត់ និង​ថែមទាំង​មាន​អាការ​រួម​ផ្សេងទៀត​ដូចជា ក្តៅខ្លួន ហើម ដកដង្ហើម​មិន​ស្រួល ក្អួត អាការ​បែបនេះ​ត្រូវ​ប្រញាប់​នាំ​កូន​ទៅ​ជួប​គ្រូពេទ្យ ព្រោះ​អាច​ឆ្លង​មេរោគ​នៅក្នុង​ឈាម។

     អាការ​ទាំង5 ដែល​បាន​រៀបរាប់​មកនេះ​គឺជា​អា​ការដែល​ហាក់ដូចជា​ធ្ងន់ធ្ងរ ហើយ​បើ​ឪពុកម្តាយ​សង្កេតឃើញថា កូន​មាន​អាការ​បែបនេះ​នោះ ត្រូវ​ប្រញាប់​នាំ​កូន​ទៅ​មន្ទីរពេទ្យ​ជាបន្ទាន់​កុំ​បង្អង់​យូរ​ឱ្យសោះ ព្រោះ​អាការ​ទាំងនេះ​សុទ្ធសឹងតែ​អាច​បង្ក​គ្រោះថ្នាក់​ដល់​អាយុជីវិត​កូន របស់​អ្នក៕