សកម្មភាពកម្មការិនីកំពុងបំពេញការងារក្នុងរោងចក្រ
របាយការណ៍របស់ក្រសួងពាណិជ្ជកម្ម បានបង្ហាញថា ក្នុងឆ្នាំ2015 កន្លងមកមានក្រុមហ៊ុនថ្មីជាការិយាល័យតំណាងពាណិជ្ជកម្មនិងសាខាក្រុមហ៊ុនបរទេសប្រមាណ3,800ក្រុមហ៊ុនបានមកចុះបញ្ជីនៅកម្ពុជា ដែលចំនួននេះ គឺកើនឡើងជិត12% បើធៀបទៅនឹងឆ្នាំ2014 ខណៈមានក្រុមហ៊ុន និងរោងចក្រកាត់ដេរសម្លៀកបំពាក់មួយចំនួនគ្រោងនឹងបិទទ្វារនៅឆ្នាំ2016 នេះផងដែរ។
ក្រសួងពាណិជ្ជកម្មបានឱ្យដឹងថាកាលពីឆ្នាំ2015 មានរោងចក្រកាត់ដេរប្រមាណ130 បានបិទទ្វារជាស្ថាពរ ខណៈមានក្រុមហ៊ុន និងរោងចក្រកាត់ដេរសម្លៀកបំពាក់ចំនួនជាង150ផ្សេងទៀត គ្រោងនឹងបិទទ្វារក្នុងឆ្នាំ2016នេះផងដែរ ដោយក្រុមហ៊ុន និងរោងចក្រនីមួយៗសុទ្ធតែបានអះអាងពីហេតុផលផ្សេងៗគ្នាក្នុងនោះរួមមានសមត្ថភាពប្រកួតប្រជែងទាប និងការដំឡើងប្រាក់ឈ្នួលគោលជាដើម។
អគ្គលេខាធិការរងនៃសមាគមរោងចក្រកាត់ដេរកម្ពុជា(GMAC) លោក កាំង មូនីកា បាននិយាយថា នេះជាអ្វីដែលបានកើតឡើងពិតនៅក្នុងវិស័យកាត់ដេរសម្លៀកបំពាក់នៅកម្ពុជា។ លោកបានបន្តទៀតថា ករណី រោងចក្របិទទ្វារច្រើនកាលពីឆ្នាំ2015 គឺដោយសារតែមានបញ្ហាមួយចំនួនដូចជាចរន្តនៃការប្រកួតប្រជែងបញ្ហាសហជីព និងបញ្ហាប្រាក់ឈ្នួលខ្ពស់ ដែលធ្វើឱ្យរោងចក្រនីមួយៗត្រូវចំណាយកាន់តែច្រើន។
ទោះបីជាយ៉ាងណាលោក មូនីកា បានលើកឡើងថា វិធានការរបស់រាជរដ្ឋាភិបាលបានត្រឹមតែការអនុញ្ញាតពន្យារការប្រមូលពន្ធលើប្រាក់ចំណេញដែលមានរយៈពេលតែ2ឆ្នាំទៀតប៉ុណ្ណោះ ពោលគឺរហូតដល់ដំណាច់ឆ្នាំ2017 ដើម្បីជួយកែសម្រួលការគ្រប់គ្រងទុនបង្វិលរបស់ម្ចាស់រោងចក្រ។
ការប្រកាសពន្យារការប្រមូលពន្ធលើប្រាក់ចំណេញចំពោះក្រុមហ៊ុន ឬរោងចក្រនេះមិនមានន័យថា រដ្ឋាភិបាលលើកលែងពន្ធលើប្រាក់ចំណេញដល់ម្ចាស់រោងចក្រកាត់ដេរនោះទេ តែបើយោងតាមការឱ្យដឹងរបស់លោក ជាតិ ខេមរា មន្ត្រីជាន់ខ្ពស់សមាគមរោងចក្រកាត់ដេរថា ការពន្យារពេលនេះនឹងជួយសម្រួលដល់ម្ចាស់រោងចក្រឱ្យមានដើមទុនបង្វិលច្រើនជាងមុន និងមានលំហូរសាច់ប្រាក់ងាយស្រួលជាងមុនទៀតផង។
យន្តការនេះក៏នឹងជាការជួយសម្រួលដល់ម្ចាស់រោងចក្រមួយកម្រិត ទាក់ទងនឹងការបង្វិលសាច់ប្រាក់ ខណៈពួកគេកំពុងត្រូវការដើមទុនបង្វិលច្រើនជាងមុនបន្ទាប់ពីប្រាក់ខែគោលរបស់បុគ្គលិកក្នុងវិស័យកាត់ដេរបានកើនឡើងពី128ដុល្លារក្នុងមួយខែមកដល់140ដុល្លារក្នុងមួយខែគិតចាប់ពីឆ្នាំ2016នេះតទៅ។
បច្ចុប្បន្ននេះការអនុវត្តចុះបញ្ជីផ្តល់សិទ្ធិនាំចេញក្រោមប្រព័ន្ធអនុគ្រោះពន្ធសម្រាប់រោងចក្រ ឬក៏ក្រុមហ៊ុនកាត់ដេរសម្លៀកបំពាក់ មានចំនួនប្រមាណ892 ក្រុមហ៊ុនរោងចក្រផលិតស្បែកជើងមាន90 និងរោងចក្រផ្សេងៗទៀតប្រមាណ165។
គិតមកទល់ពេលនេះវិស័យកាត់ដេរនិងស្បែកជើងនៅតែជាវិស័យស្នូលក្នុងការជំរុញកំណើនសេដ្ឋកិច្ចកម្ពុជា ដោយមានបុគ្គលិកបម្រើការងារផ្នែកនេះជាង70ម៉ឺននាក់។ កាលពីឆ្នាំ2014 កម្ពុជាបាននាំចេញផលិតផលកាត់ដេរ និងស្បែកជើងមានតម្លៃគិតជាទឹកប្រាក់ជិត6ពាន់លានដុល្លារ ស្មើនឹងជាង30%នៃទំហំសេដ្ឋកិច្ច៕
No comments:
Post a Comment