ក្នុងសម័យបច្ចុប្បន្ន ទោះមានការផ្សព្វផ្សាយជាសាធារណៈពីគុណប្រយោជន៍ខ្ពស់នៃការបំបៅដោះកូនយ៉ាងណាក៏ដោយ យើងសង្កេតឃើញថា មានស្ត្រីមិនច្រើនឡើយដែលអាចបំបៅកូនរហូតដល់ ពេល៦ខែ ឬ លើសពីនេះ ។ នោះ ក៏ដោយសារជីវភាព តម្រូវអោយស្ត្រីត្រូវចេញធ្វើការ បន្ទាប់ពីសម្រាកលំហែមាតុភាព ៣ខែ ដែលនេះមិនអំណោយដល់ការបំបៅកូនឡើយ។
ដូច្នេះ ការប្រើប្រាស់ម្ស៉ៅទឹកដោះគោជំនួសទឹកដោះម្តាយបានក្លាយជារឿងសាមញ្ញទៅហើយ។ ការប្រើទឹកដោះគោម្ស៉ៅជំនួសមិនមានផលប៉ះពាល់អវិជ្ជមានអ្វីនោះទេ តែគ្រាន់តែអាចធ្វើអោយទារកប្រឈមនឹងបញ្ហាសុខភាពមួយចំនួន ដែលទាមទារអោយម្តាយឪពុកតាមដាន និងយកចិត្តទុកដាក់។ តែយ៉ាងណាក៏ដោយមានករណីកំរខ្លះ ដែលការប្រើប្រាស់ទឹកដោះគោម្ស៉ៅផ្តល់ផលអវិជ្ជមានធ្ងន់ធ្ងរ។
ការដែលយល់ថាទឹកដោះគោម្ស៉ៅ និងទឹកដោះ ម្តាយដូចគ្នាគឺជាការយល់ខុស
ទឹកដោះគឺជាអាហារដែលសមស្របបំផុតតែមួយមុខគត់សម្រាប់ទារកទើបនឹងកើត រហូតដល់ ៦ខែ ។ ទឹកដោះ មានពីរប្រភេទ គឺទឹកដោះម្តាយ និងទឹកដោះគោម្ស៉ៅ (Formula) ។ ក្នុងចំណោមទឹកដោះទាំងពីរប្រភេទនេះ ទឹកដោះម្តាយគឺជាអាហារដែលល្អ និងមានផលប្រយោជន៍បំផុតសម្រាប់ទារកទើបនឹងកើត និងម្តាយ ព្រោះទឹកដោះម្តាយមានសារធាតុចិញ្ចឹមដូចជា ជាតិក្លុយស៊ីត ប្រូតេអ៊ីន ខ្លាញ់ និងវីតាមីនផ្សេងៗ ជាច្រើនទៀត ដែលទឹកដោះគោម្ស៉ៅពិបាកធ្វើដូច។ ដោយមានសារជាតិចិញ្ចឹមល្អបែបនេះហើយទើបអាចធ្វើអោយងាយរំលាយបានល្អ មិនបញ្ហាដូចជាការឈឺពោះញឹកញាប់ ដូចទឹកដោះគោម្ស៉ៅនោះ ទេ។
ទឹកដោះម្តាយមានសូដ្យូមតិចតួច មិនច្រើនពេក ដែលសមស្របជាមួយនឹងមុខងារតម្រងនោមរបស់ទារកទើបនឹងកើត ព្រោះ ទារកទើបនឹងកើតមិនត្រូវការជាតិសូដ្យូមច្រើនទេ ដោយហេតុថាសូដ្យូមច្រើនអាចធ្វើអោយកាល់ជាតិទឹកអំបិល តម្រងនោមបញ្ចេញមិនអស់អាចធ្វើអោយហើមពោះ ។
ទឹកដោះម្តាយប្រែប្រួលទៅតាមពេលវេលា ទៅតាមតម្រូវការរបស់កូន។ ក្នុងទឹកដោះម្តាយមានសារធាតុជួយដល់ប្រព័ន្ធការពារសម្រាប់ទប់ទល់ទៅនឹងជម្ងឺឆ្លងផ្សេងៗបានច្រើនយ៉ាង ដូចជាអាចការពារជម្ងឺអាឡែកហ្ស៊ឺ ចំណីអាហារ(ប្រតិកម្មអាហារ) ប្រតិកម្មផ្លូវដង្ហើម ជាពិសេសទឹកដោះម្តាយអាចការពារកុំអោយកើតមានជម្ងឺធាត់ បើសិនជាម្តាយបំបៅដោះកូនបានលើសពី ៦ខែ ។ ទឹកដោះម្តាយជួយអោយកូនលូតលាស់បានល្អ ទាំងចិត្តគំនិត និងសតិអារម្មណ៍ល្អ។
ផលប៉ះពាល់នៃ ការប្រើប្រាស់ទឹកដោះ គោម្ស៉ៅ
ជាទូទៅ ទឹកដោះគោម្ស៉ៅមិនល្អដូចជាទឹកដោះម្តាយទេ ព្រោះតែទឹកដោះគោម្ស៉ៅកើតចេញពីការផលិតដោយប្រើរូបមន្ត បច្ចេកទេសវិទ្យសាស្ត្រ ហើយត្រូវស្តុកទុកក្នុងកំប៉ុង ឬដបដោយមានសុពលភាពនៃអំឡុងពេលប្រើច្បាស់លាស់។
ក្នុងករណីដែលដំណើរការនៃការផលិតទឹកដោះគោម្ស៉ៅមានភាពមិនប្រក្រតី ឬខុសបច្ចេកទេស ការស្តុកទុកគ្មានអនាម័យ ឬ ខុសស្តង់ដា ធ្វើអោយប៉ះពាល់គុណភាព និងផុតសុពលភាពប្រើប្រាស់អាចបណ្តាលអោយមានផលអវិជ្ជមានដល់សុខភាពទារកដែលប្រើប្រាស់ទឹកដោះគោនោះ។
មានករណីខ្លះ ទឹកដោះគោម្ស៉ៅអាចធ្វើអោយទារកបៅហើយរាក ជួនកាលធ្វើអោយទល់លាមក ហើមពោះ ឈឺពោះជាដើម។ ករណីខ្លះទៀតដែលម្តាយរៀបចំទឹកដោះគោម្ស៉ៅហើយមិនបានធ្វើអនាម័យបានល្អអាចធ្វើអោយឆ្លងរោគ ឆ្លងជម្ងឺ ធ្វើអោយទារកកើតមកមានជម្ងឺផ្សេងៗ ជួនកាលអាចធ្ងន់ធ្ងរ ធ្វើអោយរលាកពោះវៀន ឬក៏អាចធ្វើអោយកុមារធាត់លើសទម្ងន់ថែមទៀតផង។
វិធីការពារចំពោះមាតាដែលអោយកូនបៅទឹកដោះគោម្ស៉ៅ
ម្តាយគ្រប់រូបអាចដឹងហើយថា ការបំបៅដោះកូនដោយទឹកដោះគោម្ស៉ៅអាចបង្កផលវិបាក តែផលវិបាកខ្លះអាចការពារបាន ហើយខ្លះទៀតក៏មិនអាចការពារបានទេ។ ផលវិបាកដែលមិនអាចការពារបាននោះ គឺធ្វើអោយទារកប្រឈមមុខខ្ពស់នឹងការមានជម្ងឺផ្សេងៗដូចជា រាករូស ហើមពោះ ទល់លាមក និងរលាកបំពង់ក។ ចំណែកឯផលវិបាកដែលអាចការពារបាន ឬអាចកាត់បន្ថយបានខ្លះៗ គឺផលវិបាកកើតឡើងដោយសារការខ្វះអនាម័យនៅក្នុងការរៀបចំទុកដាក់។ ដូចនេះ ម្តាយត្រូវតែមានអនាម័យក្នុងការរៀបចំម្ស៉ៅទឹកដោះគោអោយកូនបៅដោយត្រូវអនាម័យទៅតាមការណែនាំរបស់គ្រូពេទ្យដូចជា ៖
•ត្រូវសម្អាតកន្លែងដាក់ម្ស៉ៅទឹកដោះគោ និងដបទឹកដោះគោអោយបានស្អាតជានិច្ច
•ត្រូវលាងដៃអោយបានស្អាតជាមួយនឹងសាប៊ូមុននឹងរៀបចំលាយម្ស៉ៅទឹកដោះគោអោយទារក
•ដបទឹកដោះគោ ក្បាលដប គម្របដប និងសម្ភារៈដែលប្រើប្រាស់សម្រាប់លាយទឹកដោះគោនោះត្រូវលាងសម្អាតហើយត្រូវស្ងោរសម្លាប់មេរោគជាប្រចាំ
•ទឹកដោះគោ ដែលលាយហើយត្រូវអោយទារកបៅភ្លាមៗ
•ទឹកដោះគោមួយដបត្រូវអោយទារកបៅអោយអស់ក្នុងរយៈពេលមួយម៉ោង ហើយបើទារកបៅឆ្អែតនៅសល់ត្រូវតែចាក់ចោល ព្រោះកាលណាបើទុក គឺអាចបង្កអោយមានមេរោគដែលធ្វើអោយទារកឈឺ
•បើសិនជាលាយទឹកដោះគោម្ស៉ៅ ហើយទារកមិនទាន់បៅត្រូវទុកក្នុងទូទឹកកកដែលត្រជាក់ តែមិនត្រូវដាក់នៅកន្លែងកកទេ ។ ដល់ពេលទារកចង់បៅទើបអោយទារកបៅ ដោយទុកអោយទឹកដោះគោនោះ ត្រលប់មកសីតុណ្ហភាពធម្មតាសិន។
+ ចំណាំ ៖ ១. ទារកផ្សេងគ្នាទទួលយកទឹកដោះគោម្ស៉ៅប្រភេទផ្សេងគ្នា។ ឧទាហរណ៍ដូចជា ទារក A ញុំាទឹកដោះគោម្ស៉ៅម៉ាក A ធំធាត់មានសុខភាពល្អ បត់ជើងស្រួល តែទារក B ញុំាទឹកដោះគោ A ដូចគ្នាបែរជាស្គម ឬមិនឡើងសាច់ ឬក៏អាចទល់លាមកជាដើម។ ដូច្នេះ ទារក B ត្រូវផ្លាស់ប្តូរម្ស៉ៅទឹកដោះគោទៅប្រើប្រភេទមួយទៀត ដែលធ្វើអោយទារកនោះមានការលូតលាស់ល្អត្រឹមត្រូវទៅតាមមា្រតដ្ឋាន។ ដូច្នេះម្តាយឱពុកគប្បីសាកល្បងទឹកដោះម្ស៉ៅប្រភេទណាមួយរហូតដល់រកបានប្រភេទដែលសមស្របបំផុតសម្រាប់កូនរបស់ខ្លួន៕
